Әлеуметтік-экономикалық дамуға жәрдемдесу

Компания ірі салық төлеуші бола отырып және Қазақстан Республикасының салық заңнамасының талаптарын қатаң сақтай отырып, ел өңірлерінің дамуына елеулі үлес қосады.

Қазақстан Республикасының салық заңнамасы мен құқық қолдану тәжірибесі жиі өзгерістерге және әртүрлі түсіндірмелерге, оның ішінде ретроспективті қолдануға ұшырайды. Кейбір жағдайларда салық салынатын базаны айқындау кезінде ҚЕХС (МСФО) нормалары пайдаланылады, оларды салық органдарының түсіндіруі Топтың шоғырландырылған қаржылық есептілігін дайындау кезінде қолданылатын есеп саясаты мен кәсіби пайымдарынан ерекшеленуі мүмкін. Бұл қосымша салық міндеттемелерінің туындауына әкеп соғуы мүмкін. Сонымен қатар, салық органдары тиісті салық кезеңі аяқталғаннан кейін бес жыл ішінде ретроспективті тексерулер жүргізуге құқылы.

2024 жылы Компания Горизонтал мониторинг (ГМ) режиміне көшуге дайындық шеңберінде жүргізілген тарихи деректерді талдауға байланысты салық даулары бойынша сот процестерін сәтті аяқтады. Тарихи салықтық тәуекелдерді реттеу 2025 жылы Қазақстан Республикасы Қаржы министрлігінің Мемлекеттік кірістер комитетінің Компанияны Горизонтал мониторинг режиміне көшіру жобасын жүйелі және кезең-кезеңімен іске асыруға жұмылуға мүмкіндік берді. Горизонтал мониторинг режимін енгізуге әдіснамалық және техникалық дайындықтың тиісті деңгейін қамтамасыз ету үшін Компания профильдік ІТ-интеграторлармен және мамандандырылған әдіснамалық консультанттармен шарттар жасасты. 2025 жылы Горизонтал мониторинг процестері мен құралдарын енгізу жұмыстары практикалық іске асырудың белсенді кезеңіне ауыстырылды.

2025 жылғы маусымда «МАЭС‑1» ЖШС-нің атына жоспардан тыс тақырыптық салықтық тексеру нәтижелері бойынша хабарлама ұсынылды. Қосымша есептеудің негізі жеткізушілердің бірімен жасалған мәмілелердің жарамсыз деп танылуы болды. Қосымша есептелген салықтар мен өсімпұлдың жалпы сомасы 421,1 млн теңгені құрады. Аталған хабарлама бойынша міндеттемелер Қазақстан Республикасының салық заңнамасында белгіленген тәртіппен Компания тарапынан толық және уақытылы өтелді.

«Самұрық‑Энерго» АҚ-та салықтық есепті жүргізуге бірыңғай әрі жүйелі тәсілді қамтамасыз ететін Салықтық есеп саясаты енгізілген және қолданылады. Құжат Қазақстан Республикасының Салық кодексі, бейіндік нормативтік құқықтық актілер және ҚЕХС талаптары негізінде әзірленген және Компания Басқармасымен бекітіледі.

Салық саясатының іске асырылуын бақылауды экономика және қаржы жөніндегі басқарушы директор жүзеге асырады, ал салықтық есептің дұрыстығына және есептіліктің шынайылығына жауапкершілік бухгалтерлік және салықтық есеп департаментінің директорына жүктелген. Саясат жаңартылуы салық заңнамасының өзгеруіне немесе шаруашылық операцияларды неғұрлым дәл көрсету қажеттілігіне байланысты жүргізіледі.

Салық саясаты даму стратегиясымен, корпоративтік басқару және тәуекелдерді басқару жүйелерімен интеграцияланған. Компанияның салық салу тәсілі заңнаманы қатаң сақтауға, ашықтыққа және салық процестерін бақылауға негізделген.

Салықтық реттеудің үздіксіз өзгеруі жағдайында Компания заңнаманы, сот тәжірибесін және уәкілетті органдардың түсіндірмелерін тұрақты түрде мониторингтеп отырады, сондай-ақ тәуекелдерді барынша азайту және міндеттемелерді қаржылық есептілікте дұрыс көрсету мақсатында салықтық ұстанымдарға тұрақты бағалау жүргізеді.

Салық саясаты салықтық тәуекелге төмен төзімділікпен сипатталады — біз салық органдарымен даулардың туындау тәуекелін барынша азайтуға ұмтыламыз. Біз салық мәселелерінде ашықтық пен айқындық қағидаттарын ұстанамыз және мемлекеттік кірістер органдарымен келіспеушіліктердің пайда болу ықтималдығын барынша төмендетуге тырысамыз. Осы мақсатта салық міндеттемелерін орындаудың дұрыстығына тікелей әсер ететін процестерге ерекше назар аударылады.

Салық мәселелерін басқаруымыз қолданылатын заңнаманы қатаң сақтай отырып, салықтық тәуекелдер мен міндеттемелерді жүйелі бақылауға негізделген, сондай-ақ акционерлердің ұзақ мерзімді мүдделерін және операциялық, экономикалық және беделдік факторлардың әсерін ескеруге бағытталған. Салық саясатын іске асырудың маңызды элементі барлық деңгейдегі салық органдарымен сындарлы және тұрақты өзара іс-қимылды қамтамасыз ету болып табылады, бұл ықтимал жағымсыз салықтық салдарлардың алдын алуға мүмкіндік береді.

Біз салықтық әкімшілендіруге қатысты барлық мәселелер бойынша негізгі мүдделі тараптармен тұрақты және сындарлы өзара іс-қимылды қолдаймыз. Өз қызметімізде біз ашықтық және салық органдарымен ақпарат алмасудың айқын қағидаттарын ұстанамыз, заңнама талаптарына толық сәйкес қажетті есептілікті уақтылы ұсынамыз.

«Самұрық-Энерго» АҚ сондай-ақ салықтық реттеуді жетілдіру бойынша сараптамалық талқылауларға қатысады, оның ішінде қосылған құн салығы (ҚҚС) және төлем көзінен ұсталатын корпоративтік табыс салығы (КТС) мәселелері бойынша. Біздің ұсыныстарымыз жаңа Салық кодексі жобасында көзделген нормаларды одан әрі дамытуға бағытталған.

Біз қызметімізді іскерлік этиканың жоғары стандарттарын сақтай отырып жүргіземіз және салықтарды оңтайландырудың адал емес тәжірибелерін қолданбаймыз.

Кез келген орын алған және/немесе болжамды салық заңнамасын бұзу фактілері туралы "тәулік бойы жұмыс істейтін сенім телефонына" хабарлама жіберу арқылы хабарлауға болады

«Самұрық-Энерго» АҚ қатысу өңірлерінің әлеуметтік-экономикалық дамуына және жергілікті қауымдастықтармен ынтымақтастықты нығайтуға бағытталған жобалар мен бағдарламаларды іске асыруға белсенді қатысады. Бұл бағыттағы қызмет жүйелі тәсіл негізінде жүзеге асырылады — жыл сайын басымдықтар айқындалып, бастамалар халықтың, өңірлік билік органдарының және басқа да мүдделі тараптардың қажеттіліктерін ескере отырып қалыптастырылады.

«Самұрық-Энерго» АҚ компаниялар тобы деңгейінде жергілікті қауымдастықтарды дамыту бағдарламасы жыл сайын тұрақты негізде әзірленеді, оның іске асырылуы кейіннен мониторингпен және қол жеткізілген нәтижелерді ²²бағалаумен сүйемелденеді.Есепті кезеңде жүзеге асырылған іс-шаралар аймақтардағы тұрмыс сапасын арттыруға, әлеуметтік инфрақұрылымды дамытуға, жастардың мүмкіндіктерін кеңейтуге, мәдени-ағартушылық әлеуетті арттыруға, аумақтардың экологиялық тұрақтылығын сақтауға ықпал етті.

Қазақстан Республикасы Үкіметінің тапсырмасына сәйкес, 2024 жылғы 17 маусымда Екібастұз жылу электр орталығы Екібастұз қаласының әкімдігі тарапынан «Energy Solutions Center» ЖШС арқылы «Самұрық-Энерго» АҚ-ның сенімгерлік басқаруына негізгі жөндеу жұмыстарын жүргізу және активтерді станцияның сенімді жұмысын және қаланы үздіксіз жылумен қамтуды қамтамасыз ететін күйде кейіннен қайтару мақсатында берілді.

Кәсіпорын жылу энергиясын өндіру процесін жүзеге асырады және Екібастұз қаласы халқын орталықтандырылған жылумен қамтамасыз етудің жалғыз көзі болып табылады.

Қолданыстағы генерациялаушы қуаттарды жаңғырту бойынша мемлекеттік саясатты іске асыру шеңберінде «Самұрық-Энерго» АҚ Екібастұз ЖЭО күрделі жөндеу құнын бағалады. Күтілетін экономикалық тиімділіктің болмауын ескере отырып, келісім шарт ауыртпалықты деп танылды, осыған байланысты Компания өз қаражаты есебінен тиісті міндеттемелер бойынша резерв қалыптастырды. Байланысты шығыстар Компанияның таза пайдасына әсер етпей, бөлінбеген пайдасын азайту арқылы капитал құрамында көрсетілді.

Аймақтың әлеуметтік-экономикалық дамуына үлес қосу шеңберінде 2025 жылғы қаңтардан желтоқсанға дейінгі кезеңде Екібастұз ЖЭО-да қазандық агрегаттарының негізгі элементтерін толық ауыстыруды, сондай-ақ жалпы станциялық жабдықтарды жөндеуді қамтитын ауқымды жөндеу бағдарламасы іске асырылды.